PTH 2

Fifili & Fekumi

 Kiribati Chinese
Ko e founga talitali eni 'e Kiribati 'a e 'Amipasitoa Siaina ki Kiribati

Situʻa kau Palōfesa Siaina mo e ngaahi fonua lahi mei he CCP…tukuakiʻi Huawei sipai ʻi PNG…Talitali Kiribati CCP…fēfē Tonga?
Fakamatala foʻou ki he vailasi koloná.

Fifili: Talu hono fokotuʻu e Paati Kominiusi ʻa Siainá (CCP) ʻi he 1921 ko hono toki poleʻi fefeka eni ʻi māmani ʻi hono taʻu 99. ʻOku taʻu motuʻa ange ʻa e Puleʻanga Tongá ia ʻi he CCP. Ko e hā ʻoku fakalalahi ai ʻa e situʻa mei he CCP?
Fekumi: Ko e pule fakaaoaó ʻoku ʻi ai pe hono ngataʻanga he ko e tauʻatāiná ko e totonu faka-ʻOtua naʻe fanauʻi mai pe mo e tangatá mo e fefiné ko e konga hono ngeiá. Ko hono faʻao fakamālohiʻi pea fakapōpulaʻí ko e faihala. Ko ia ʻe ʻi ai pe ʻa e taimi ʻe tuʻu hake ai ha taha pea ha kakai ʻo ʻeke ʻa ʻenau totonu ki he tauʻatāiná. Ko e situʻa mei he CCP ko hono ʻeke ia ʻo e totonu ki he tauʻatāiná ʻa ia ko e konga ʻo e ngeia ʻo e tangata mo e fefine kotoa pe ʻi he māmaní.

Cai XipigFifili: Ko e taʻu 99 eni ʻo e CCP ʻoku tokolahi ha kakai ʻi loto Siaina ʻoku nau ʻeke ʻenau totonu ki he tauʻatāiná?
Fekumi: Ko e tokolahi ʻo Siainá ko e toko 1.4 piliona. Kapau ʻe muimui ʻi he “Taha pe ʻa Siainá” (One China Policy) ʻe lau ʻa Hong Kong pea mo Taiwan ki ai. Ko e tokolahi ʻo Hong Kong ko e toko 7.5 miliona. Kapau ʻe toʻo ʻa e toko 5 kilu ko e kau poupou kakato ki he CCP pea ʻoku lolotonga fakafekiki pe ʻa e toko 7 miliona kenau tauʻatāina mei he CCP pea ke pule fakatemokalati pe ʻa Hong Kong.
Ko Taiwan ko e toko 23.6 miliona pea ʻoku puleʻi fakatemokalati pe ʻa Taiwan pea ʻoku lau pe ʻe Taiwan ia ko e puleʻanga tauʻatāina pe kinautolu. Kapau ʻe toʻo ʻa e toko 6 kilu ko e poupou kakato ki he CCP pea ko e toko 23 miliona leva ʻoku nau loto ke tauʻatāina kakato mei he pule ʻa e CCP. ʻOku palani e vaʻa fakakautau ʻa Siainá ke ʻohofi ʻa Taiwan kimuʻa ʻi he senituli ʻa e CCP ʻi he 2021 ka ʻoku maluʻi ʻe ʻAmelika ia ʻa Taiwan.
Ko e toko taha miliona tupu ʻo e kau Uyghurs ʻoku fakahū pilisone ʻi Xinjiang ʻi loto Siainá ka ko e tokolahi ʻo Xinjiang ko e toko 24.4 miliona. Ko Xinjiang naʻe puleʻanga mavahe pe foki ia pea ʻiloa ko e East Turkistan Republic ʻo e matakali Uyghurs pea tauʻi ʻe he CCP ʻo toki ui ko Xinjiang ʻi he 1955. ʻE lava pe ke pehē ko e toko 20 miliona ʻo e kakai Uyghurs ʻoku nau loto ke tauʻatāina pea ko e kakai Mosilemi pea ʻoku vā ofi ʻenau leá mo e kakai Toaké (Turkey). Ko e meʻa ia ʻoku ilifia ai ʻa e CCP ʻi he Uyghurs telia naʻa nau liliu ʻo tautoitoi Mosilemi.
ʻI he 1949 naʻe ʻohofi ai ʻe he CCP ʻa Tibet pea toki puleʻi leva ko e konga ʻo Siaina ʻi he 1950. Ko e tokolahi ʻo Tibet ko e toko 6 miliona pea naʻe hola ʻa e Dalai Lama ko e Taki Fakalaumālie ʻo Tibet pea ʻoku kei nofo pe ʻi ʻInitia ʻo tali ki ha taimi ʻe toe tauʻatāina ai ʻa Tibet mei Siaina. Ka tau ʻa ʻInitia mo Siaina ʻe kau ʻa e kakai Tibet ia ki ʻInitia.
Ko e kakai Kalisitiane ʻo Siainá ʻoku fakafuofua ki he toko 44 miliona. Kuo lahi e ngaahi falelotu kuo holoki fakamālohi pea taʻaki mo e Kolosí mei he ngaahi falelotu lahi. Ko e toko lahi ʻo e kau Kalisitiané ʻoku nau lotu fakapulipuli pe pea ko e kulupu ia ʻoku faingataʻa hono feingaʻí.
Ko ia Fifili ʻoku ʻosi tokolahi pe ʻa e kakai ia ʻi loto Siaina ʻoku nau fakaʻamu kenau tauʻatāina. ʻOku puleʻi ʻe he ilifiá ia ʻa e CCP pea ko e ilifia lahi tahá pe ko e ilifiaʻi hono kakaí. Ko e ʻuhinga lahi ia ʻo e “Chinese Firewall” ko hono maluʻi ʻa e ʻinitanetí ke ʻoua ʻe hū ha ngaahi fakamatala tauʻatāina mei tuʻa ki loto Siaina telia naʻa ʻilo ʻe he kakaí ʻa e moʻoní pea nau angatuʻu ʻo hangē ko e Tiananmen Square ʻi he 1989. Ko ia ko e fakamatala kotoa pe ʻoku ʻave ki he kakaí ʻoku puleʻi kotoa pe ia ʻe he CCP pea nau puleʻi kakato ai e ʻatamai ʻo e kakaí mo e meʻa kenau tui ki aí.

Fifili: Fēfē ʻa e kakai māʻolunga pea mo poto ʻi loto Siainá? Ko e hā e meʻa ʻe hokó kapau te nau lea ʻo fakaangaʻi ʻa e CCP?
Fekumi: ʻOku kiʻi olioli ange kapau ko e fakaangaʻi ʻa e CCP. ʻOua pe ʻe lea ʻo fakaangaʻi ʻa Palesiteni Xi Jinping. ʻOku fakafuofua ki he toko taha miliona tupu ʻa e kakai māʻolunga ʻo hangē ko e tokotaha naʻe fakaangaanga ke Palesiteni kae ʻikai ko Xi Jinping. Ko e tokotaha ko iá ko e milionea ko Bo Xilai, pea kau ki ai mo e Seniale Mālōlō mei he vaʻa fakakautaú ko Guo Boxlong, mo e Pule Māʻolunga ʻi he vaʻa maluʻí ko Zhou Yongkang pea naʻe ʻi he Kulupu Taki Māʻolunga ʻa e CCP. Naʻe tukuakiʻi kinautolu ko e teuaki ke liukavaʻi ʻa Xi Jinping. ʻOku nau ʻi pilisone mo e toko taha miliona tupu. ʻOku nau fakaʻamu ko kinautolu ke nau tauʻatāina.

Fifili: ʻOku ʻi ai ha kakai fefine ʻoku nau kau hono fakaangaʻi e CCP pe ko e kau Taki ʻo e CCP?
Cai XiaFekumi: ʻI he ʻaho Monite 17 ʻo ʻAokosí naʻe tuli ai mei he CCP ʻa e fefine māʻolunga ʻi he CCP ko Palōfesa Cai Xia. Naʻe faiako ʻi he Central Party School ʻa ia ʻoku teuteuʻi ai ʻa e kau Taki ʻo e CCP. Ka ko eni kuo fakanofo pea tuli mei he paati CCP. Ko e ʻosi ia ʻa e katakí ʻi he faʻahinga pule fakaaoaó.
Naʻe fakaʻekeʻeke ia ʻe he kautaha ongoongo ko e Guardian ʻi Sune pea naʻe kole ʻa e Palōfesá ke ʻoua naʻa tuku ki tuʻa hono fakaʻekeʻeké kae ʻoleva ke hola mo hono fāmilí. Naʻe kamata ke mama ki tuʻa ʻa e fakaʻekeʻeke ʻo e Palōfesá pea naʻe ui ai ʻe he Palōfesa Fefiné ʻa Palesiteni Xi Jinping ko e “Taki Mafia” (Mafia Boss).
ʻI he ngaahi fakamatala ʻa e ngaahi kautaha ongoongó naʻe ʻosi hola ʻa Palōfesa Cai Xia ki ʻAmelika pea toki tukuange leva ʻa e fakaʻekeʻeké. Naʻe mahino naʻe ʻosi fakakau ʻe Xi ʻa e tokolahi ʻene kau poupoú ki he kau Taki Māʻolunga ʻo e CCP pea ʻi he 2018 naʻe fakamālohiʻi leva e liliu ʻo e Konistutoné ke taki tokotaha pe ia ʻo ʻikai toe fakangatangata. Naʻe pehē ʻe he Palōfesá ko hono “tamateʻi ia ʻo e paatí mo e fonuá” ʻe he foʻi tokotaha pe pea ʻikai ke toe lea atu ha taha ke fakatonutonu.
“Mou vakai atu kuo fepaki ʻa Siaina mo ʻAmelika. Kuó ne fulihi ʻa e māmaní ko honau fili.” Ko e palani ia ʻa Xi Jinping ke fakafefekaʻi hono tuʻunga taki ʻi loto Siainá ʻaki ʻa ʻene fakatupu moveuveu ki ʻAmelika mo ʻInitia pea mo e ngaahi fonua kehekehe. Ka ne toki tala leva ki he kakaí ʻoku fakatuʻu fili ange ʻa e ngaahi fonuá ki Siaina pea ʻoku tonu kenau tuʻu fakataha.
Kuo pekia ʻa Toketā Li Wenliang pea mo e tokolahi ka naʻe ʻikai ke totonu ke nau pekia. Naʻe ʻosi ʻilo ʻe Xi Jinping ʻa e mafola ʻa e Koviti-19 kae longo pe ia pea kuo pehē ʻe he Palōfesá kuo kamata ʻa e mafuli ʻa e loto ʻo e kakaí mei he taki ʻa Xi Jinping. Kuo lahi ʻa e taʻemaʻu ngāué, hikihiki e mahuʻinga ʻo e koloá pea kuo fulutamakia ʻa e kakaí. ʻOku tui ʻa Palōfesa Cai Xia ko e peseti ia ʻe 70% ʻo e kau taki māʻolunga pea mo e kau taki lotoloto ʻoku nau loto ke fakahoko ha liliu fakapolitikale ki he pule fakatemokalatí. ʻOku fiemaʻu ʻa e moʻoní ke tala ki he kakaí kae lava ʻa e kakaí ʻo fakakaukau. “ʻOku fiemaʻu ʻa e tokotaha kotoa ke tauʻatāina pea lea tauʻatāina ki heʻene fakakaukaú pea ʻoua ʻe nofo pōpula.” Ko e ngaahi lea mamafa naʻe fakahoko ʻe he Palōfesá. Naʻá ne pehē ʻi he hili hono tuli mo fakanofo mei he CCP naʻe fiefia e tokolahi hono ngaahi mahení pea mo kinautolu ʻi loto ʻi he CCP. Ko hono ʻuhingá ko e lea ʻa Palōfesa Cai Xia ko ʻene lea maʻa kinautolu hono kotoa pea nau fiefia ʻi heʻene tauʻatāiná he ko honau leʻó ia. ʻIo ʻoku makehe pe ʻa e lea tauʻatāina ia ʻa e Fefine Mataotao ko ení.

Fililí: ʻOku fēfē ʻa e ngaahi fonua ʻo māmaní ʻoku ʻasi ha mafuli mei he CCP?
Fiveeyes2Fekumi: ʻOku mahino ʻa e mafuli ʻa ʻAmeliká ʻi he tataki ʻa Palesiteni Trump. ʻOku kau atu ki ai mo e Five Eyes ʻa ia ko ʻAmelika, ʻAositelēlia, Kanata, Nuʻu Sila pea mo Pilitania. Ko e Quad ko ʻAmelika, ʻAositelēlia, ʻInitia mo Siapani. Ko e Inter-Parliamentary Alliance ko ʻAmelika, Pilitania, Siamane, Siapani, Kanata, Sweden, pea mo Norway. ʻOku kau ai mo e ngaahi fonua lahi ʻo ASEAN ko ʻInitonesia, Taileni, Malēsia, Filipaini, Vietinemi, Brunei, Cambodia mo Laos. Ko e fonua ʻe taha ʻi ʻIulope ʻoku fefeka ʻene fakafepaki ki he CCP ko Slovakia pea ʻoku kau atu ki ai mo Falanisē mo e ngaahi fonua ʻi he European Union. ʻOku kei lahi pe mo e ngaahi fonua ʻoku ʻikai ke nau fiemālie ki he ngaahi founga ʻa e CCP.

Fililí: ʻOku fēfē ʻa e ngaahi ʻotu motu ʻo e Pasifikí?
Fekumi: Moʻoni e laú longo ko e loto. Ka ko e ngaahi fonua ia ʻo e Pasifikí ko e longo pe mo e ngaahi fuʻu nō mei Siaina pea ʻoku kau ai ʻa Tonga he naʻe kole ʻi he 2018 ke toe fakalōloa pea iku ʻo fakamoʻoni ki he Belt and Road Initiative (BRI) pea fakalōloa ʻa e noó ke toki kamata totongi ʻi he hili e taʻu ʻe nima.
Ko Papua Niu Kini ʻoku kiʻi fetakai mo Siaina ʻi he nō ke langa ʻenau National Data Centre pea naʻe kamata ʻa e langá ʻe he Huawei ʻa Siainá ʻi he 2014. Naʻe huufi ʻa e poloseki ko ení ʻi he 2018 pea kamata ke ʻasi ʻa e palopalema ʻi he lele ʻa e polosekí. Ko hono tauhi ʻo e ʻu meʻa ngāué naʻe fakapaʻanga pe ia ʻe he Puleʻanga PNG. Ka naʻe ʻikai ke nau lava pea nau kole ai ki ʻAositelēlia ke tokoni ange. Naʻe ʻilo ʻe ʻAositelēlia ʻa e vaivaiʻangá pea fakahoko ki he Puleʻanga PNG pea tukuakiʻi naʻe fokotuʻutuʻu pe ia ke ʻi ai ʻa e vaivaiʻanga kae lava ʻa e CCP ʻo fetuku e faile ʻa e Puleʻanga CCP ʻi he founga sipai. Ko e tukuakiʻi ko ení ʻoku fakaʻikaiʻi mamafa ʻe he CCP. ʻOku fakafekiki ʻa PNG heʻikai ke nau totongi ʻenau kinautolu ʻa e nō paʻanga ʻAmelika ʻe $53 miliona ki he polosekí he naʻe ʻikai ke lelei ʻa e fakahoko ia ʻo e ngāue naʻe ʻuhinga ai ʻa e noó.
Ka ko e meʻa tatau naʻe aʻusia ʻe ʻItiopea ʻi ʻAfilika ʻi Novema 2018 mei he Huawei ai pe. Naʻe fakatokangaʻi ʻe he senitā ʻo e African Union ʻi ʻItiopeá ʻa e hū ki he “data centre” ʻi he pō kotoa ʻi he taʻu ʻe nima pea nau tui pe ko e CCP. Ko ia ʻoua ʻe holi vaʻinga atu ki he Talākoní.
ʻOku lahi e fakaangaʻi ʻa e tā ʻi hono talitali ʻa e ʻAmipasitoa Siaina ki Kiribati ʻi he motu ko Marakei pea ko e anga fakafonua pe ia ʻo e talitali ʻa e motú ko e takoto foʻohifo e kakai tangata ʻi lalo kae lue ʻa e ʻAmipasitoá ʻi honau tuʻá ʻi heʻene hifo mei he kiʻi vakapuná. Ka ʻoku pehē ʻe he niʻihi ko e malí pe ʻoku toki fakahoko aí. Naʻe taʻu ʻe 17 ʻa e fengāueʻaki ʻa Kiribati mo Taiwan pea toki fakaʻohovale e liliu ki he CCP ʻi he taʻu kuo ʻosí. ʻOku kiʻi longolongoaʻa ai ʻa Kiribati.

Jonathan LathamFifili: Ko e faiva ia ʻo e CCP ko e fakamohemoheʻi ʻaki ʻa e fuʻu paʻangá kae toki fakaʻohovaleʻi ʻaki ʻa e ngaahi meʻa totonu ʻokú ne fiemaʻú ʻi he mahino ʻe ʻikai ke toe lava ʻo totongi e noó. Ko e meʻa ia kuo ʻā hake ai e ʻu fonuá ʻo fakapapauʻi ʻenau tauʻatāina ki honau fonua mo ʻenau koloa. Kae mālō mo e Koviti-19 ke tuʻu ai e ngaahi fonua lahi ʻo toe sio fakalelei. Ka ʻoku fēfē ʻa e vailasi Koviti-19 ke ta fakaʻosi ʻaki.Allison Wilson
Fekumi: Ko e fakatotolo mālie ʻa e ongo tangata saienisi ko Toketā Jonathan Latham ko e Virologist pea mo Toketā Allison Wilson ko e Molecular Biologist mei he Bioscience Project ʻi Ithaca, Niu ʻIoke, ʻAmelika. Naʻá na muimui ʻi he fakatotolo ʻa e Toketā Siaina ko Li Xu ʻi he malaʻe ʻo e faitoʻó pea ko ʻene lipooti ʻi he feituʻu ʻi Siaina ko Mojiang ʻoku maile ʻe 1,000 mei Wuhan ʻi he 2012. ʻOku pehē naʻe ʻi he feituʻu ko ení e kau keli malala (miners) pea naʻe ʻi ai ʻa e toko 6 naʻa nau fakamaʻa ʻa e tē ʻa e peká (hufanga ʻi he fakatapú) mei he ngaahi fuʻu misini keli malalá. Naʻa nau puke ai pea ʻave kinautolu ki falemahaki pea ko Toketā Li Xu naʻá ne tokangaʻi kinautolú. Naʻe mate ai ʻa e toko tolu. ʻI he lipooti ʻa Toketā Li ko e puke ʻa e kau tangatá naʻe hangē tofu pe ko e sipinga ʻo e Koviti-19. Ko e founga faitoʻo naʻe fai ʻe Li ko e ngāue ʻaki ʻa e “ventilators” pea huʻi tuifio ʻa e ngaahi faitoʻo ʻo hangē ko e “steroids, blood thinners, mo e antibiotics.” Naʻe hoko atu e fakatotolo ʻa Li Xu pea aʻu ai ʻo talanoa mo e Toketā ko Zhong Nanshan naʻá ne taʻotaʻofi ʻa e SARS ʻi heʻene mafola ʻi he 2003 pea ʻoku faleʻi ki he CCP ʻi he Koviti-19. ʻOku pehē ʻe Latham mo Wilson naʻe ʻave ʻe Toketā Li Xu ʻa e ʻu meʻa naʻá ne toʻo mei he kau puké fakataha mo e vailasí ki he Wuhan Institute of Virology ke tesiʻi pea tauhi ai pe ʻa e vailasí. Ko e tui leva ʻa e ongo Toketā Mataotaó naʻe mama ʻa e vailasi SARS Cov-2 mei he Wuhan Institute of Virology he konga ki mui ʻo e 2019. ʻOku hangē ʻoku kamata ke ʻasi e poupou ʻa e kau mataotao ki he fakatotolo ʻa Latham mo Wilson he ʻoku ʻuhinga mālie pea mo e fotunga ʻo e puke ʻa e kau tangata ʻi he 2012 ʻi Mojiang. Ka ta toki sio Fifili.

Contact Us

Publisher: Justin ʻAkauʻola
Editor: Filokalafi ʻAkauʻola
Email: talaki.online@gmail.com
filokalafi@gmail.com
Tel: (676) 28186
Mb: (676) 7719708
(676) 7700107
website:www.talaki.to

PTH 3
Go to top