PTH 2

Fakahekeheka e folauʻeiki ʻa Sione Vuna Faʻotusia Featured

Wednesday, 01 September 2021 16:30
(1 Vote)

Salote moe fanau

Talaki Online, 1 Sepitema 2021: KUO fakahekeheka ʻa e folau hiki fononga mei mamani ki’i ‘itāniti ʻa e Fakafofonga Fale Alea ʻo Tongatapu 7, Sione Vuna Fāʻotusia he ʻahó ni, hili ʻene malōlō he ʻaho 29 ʻo ‘Akosi 2021, ko e malōlō ʻeni e Fakafofongá ni ʻi hono taʻu 68 mo e mahina ‘e 6.

Na’e ‘ave fakafalemahaki ‘a Sione Vuna ki Nuʻu Sila ki hono faitoʻo pea hili ha mahina siʻi ne foki mai pe ki Tongá ni ʻo fakatōtōla’a pea maʻu uaifi ki a Salote Koloamatangi ʻo Mataiká mo ʻena fanau ʻe 3 pea peheé ki he toko 3 kimuʻa he malí.

Na’e hoko ʻa Sione Vuna ko e Fakafofonga Fale Alea ʻi he Fili Fale Alea 2014 ʻo ne ikuna ʻa Tongatapu 7. Na’e ui ai pe ʻa Sione Vuna ke ne hoko ko e Minisitā Lao mo e Pilīsone ‘i he 2017 ia. Hili hono fakamoveteʻi ʻo e Fale Alea he 2017, naʻe toe fili ai ʻa Sione Vuna ki Tongatapu 7 pea ne kei hoko atu pe ʻi hono lakanga Minisitaá Lao mo e Pilisone. Naʻe toe fokotuʻu ai pe ʻa Sione Vuna ʻi he Puleʻanga ʻo Dr.Pohiva Tuʻiʻonetoa ko e Tokoni Palēmia he ʻaho 9 ʻOkatopa 2019.

VunaʻI Tisema 2020, naʻe fai ai ʻe Vuna ʻa ʻene lea fefeka ki he Palēmia ke ne hifo mei he lakanga Palēmiá, naʻá ne foki mei Nuʻu Sila ʻo fakahū ʻene fakafisi mei hono lakanga Tokoni Palēmia mo Minisita Lao/Pilisone he ʻaho 16 ʻo Tisema 2020. Naʻe kau ʻa Sione Vuna ʻi hono fakahū atu ʻa e Tohi Fokotuʻu Fakahāloto Ki he Taʻefalalaʻanga (Vote of No-Confidence) ki Fale Alea ke fakahifo e Palemiá. Lolotonga ʻení ʻoku kei tokoto pe ʻa Sione Vuna ʻi Falemahaki Vaiolá ka naʻá ne lava pe ke kau ki he aleaʻi ʻo e Tohi Fokotuʻu ko ʻení, kae fakaʻosí ne ʻikai kau he palotí.

Ko Sione Vuna Fāʻotusiá ko e fika ua he fanau ʻa Tevita mo Letī Faʻotusia ʻo Tungua Haʻapaí ka nau nofo Haʻateiho. ʻOku lahi taha ʻa Taueva, Sione Vuna, Paulakolo, ‘Anaseini, Feletiliki mo Tevita. Ko e fanau ʻa Vuná ʻoku lahi taha ʻa Feletiliki Jr, Rutika, Anterson, Sesitā, Poasi mo Kelepi mo e makapuna ʻe 7.

Naʻe ako pe ʻa Vuna he GPS ʻa Tungua pea nau hiki mei ai ki Vaikeli, Haʻateiho ʻo hoko atu he GPS ʻAtele Siʻi mei ai ki he Kolisi ko Tupoú pea fakaʻosi ki he Ako Maʻolunga ko Tupoú. Naʻe hoko atu ki he Hawaii Law School pea mei ai ki he ʻUnivesiti ‘o Niusauele ʻo maʻu ai hono LLB.

‘I he ngāue fakapuleʻangá, naʻe kamata ʻa Vuna ʻi he puleʻangá he 1983 pea hikihiki lakanga ai ʻi he Ofisi Palemiá. Naʻe aʻu ki he PSC pea ʻi he taimi ʻo e Tuku Ngāué, naʻe kau ʻa Vuna he tuʻu kaukaua ʻi he uki e tukungāué mo fakaʻaiʻai ke hiki peseti 60,70 mo 80 ʻa e kau Ngaue Fakapuleʻangá. Naʻe aʻu ʻene ngaué kimuʻa pea ne hoko ko e Fakafofongá Fale Alea, ne hoko ko e CEO ʻo e Potungāue Laó. Naʻe ngata ʻene ngāue Fakapuleʻangá he 2008 ko e lava ia ʻa e taʻu ʻe 24 he Puleʻangá. Naʻe hoko ai pe ʻa Vuna ʻo ne ngāue ko e Fakafofonga Lao fakafoʻituitui fakataha mo Tomasi Fakahua, Fakahua & Faʻotusia Law Associates. Naʻe toe foki ʻa Vuna ʻo ngāue Konituleki ʻi he Puleʻangá ko e CEO ʻi he Potungaue Lao. Naʻe hoko atu ai pe ke Kanitīteiti maʻa Tongatapu 7 ʻo ne ikuna ʻa e fili ko ia mei a Sangster Saulala he 2014.

‘I he Sipotí naʻe kaunga ʻaupito ʻa Sione Vuna ʻene fakafaingofuaʻi ʻa e ngaahi liliu ʻi he faʻunga ʻo e ʻakapulu ʻIunioni ʻi Tongá ni. Lolotonga ‘ene hoko ko e Fakafofonga ʻo e Puleʻangá ki he ʻIunioni ʻAkapulú, naʻe tuku kiate ia ʻa e ngaahi meʻa fakalao ke ne fakatonutonu ʻi he Konisitūtoné ki he fili lakanga ʻa e ‘iunioní pea mo fakamalohiʻi ke nofo ʻa e Palesitení he Palēmia, “he ko e tama ia ʻoku ʻiai ʻene siliní,” ko ʻene faʻa fakahua ʻi he ʻu fakataha ʻa e ʻiunioní.

Fanau VunaNaʻe ʻAfio ʻa Tupou VI mo Kuini Nanasipauʻu Tukuʻaho ʻi he ouau malanga mo e fahú ko Pilinisi Ata. Naʻe fakahā ʻe he Faifekau Palesiteni ʻo e SUTT, Dr. Tevita Havea, “ko Sione Vuna Faʻotusiá “ko e tangata ngaue fiengāue... tui ki he ngāue lelei pea faipau ki he ngāue ko ia ke lava lelei…ʻikai ke toe fakalanulanu.. tatau he feituʻu kotoa pe.”

Neongo ʻene ngāue fakapolitikale naʻe ʻuluaki tuʻu tauʻatāina pea kau ki he PTOA pea mei ai ki he PAK pea fakafisi mei ai ʻo tuʻu fakataha mo e kau PTOA ki hono fakahū e Vouti tuku-ki-tuʻa e Palēmiá lolotongá kae fakaʻosi naʻe ʻikai ke kau he voutí.

Naʻe ʻosi fakamahino pe ʻe Vuna ki he Palesiteni SUTT ʻo hangē ko e fakahā he malangá, ʻe toe kau ʻi he fili ʻi Novemá. ‘I he fetaulaki fakamuimui ʻa e Faiongoongo ʻa e Talakí mo Sione Vuna Faʻotusiá ʻi he meʻa fakaʻeiki ʻo Dr Lei Saafi, naʻe fehuʻi ki ai pe ʻoku fēfē? Ko ʻene talí, ʻoku ou sio ki he mate.."I do not want to die now.”

Toka ā Sione Vuna Faʻotusia.. ko e fakaʻosi ia ʻa e Palesitení ʻi heʻene malangá.

Leave a comment

Make sure you enter all the required information, indicated by an asterisk (*). HTML code is not allowed.

Contact Us

Publisher: Justin ʻAkauʻola
Editor: Filokalafi ʻAkauʻola
Email: talaki.online@gmail.com
filokalafi@gmail.com
Tel: (676) 28186
Mb: (676) 7719708
(676) 7700107
website:www.talaki.to

PTH 3
Go to top