PTH 2

Puipuituʻa ki he vakapuna ʻo e kautaha Air Vanuatu naʻe tuʻuta mai mo e kau pāsese ʻe toko 14 Featured

Monday, 30 August 2021 16:37
(0 votes)

Hotele2

Talaki Online 30 ʻAokosi 2021; Ko e vakapuna ‘o e kautaha Air Vanuatu naʻe tūʻuta mai mo e kau pāsese 'e toko 14 ke fakahoko 'a e ngāue ki he polokalama poloseki 'a e Kau Tau 'a 'Ene 'Afió (His Majesty’s Armed Forces), ko e langa fakalakalaka na'e palani mei mu'a 'a e Pule'anga Tongá. Ko e hokohoko fetukutuku mai eni 'o e kau ngāue muli ke fakahoko 'a e ngāué ni neongo 'a e ngaahi fakafeʻatungia ʻa e KOVITI-19.

Na'e tū'uta 'a e toko 14 ʻi Vanuatu 'i he 'aho 7 'o Sune 2021 pea kuoʻosi fakahoko 'enau kolonitini mo e ngaahi fiema'u fakamo'ui lelei lolotonga 'enau 'i Vanuatú. Koe'uhí ko e tu'unga malu mo e hao 'o Vanuatú, 'o 'ikai ke 'i ai ha fokoutua KOVITI-19 'o a'u mai ki he ngaahi māhina na'e nofo kolonitini ai 'a e toko 14 ni, na'e tali ai ʻa e kole mei he Pule'anga Siainá, 'o fakafou mai 'i he'enau 'ofisi faka-ʻAmipasitoa 'i Nukuʻalofá, ke folau mai 'a e toko 14 koʻení.
'I he 'aho 21 'o Siulai 2021, na'e 'oatu ai 'a e kole faka-pule'anga mei he Potungaue Ki Muli 'a e Pule'anga 'o Tongá ki he Pule'anga Vanuatú, ki ha faingamalie ki ha vakapuna 'e charter 'e he Pule'anga ke folau mei Fisi ki Vanuatu 'o fetukutuku 'a e toko 43 'o hotau kāinga ‘oku lolotonga tukuvaká 'i Fisí, 'o kau ai 'a e toko 31 na'á nau folau mai mei ʻAmelika, pehē ki he kau folau tahi (seafarers) 'e toko 8 na'á nau tukuvaká mei ʻIulope, pea ke nau kolonitini 'i Vanuatu 'o talitali ai ki he folau mai 'i he vakapuna koeni na'e tu'uta mai 'i he 'aho Tu'apulelulu 26 ‘Aokosi 2021.

'I he 'aho 5 'Aokosi 2021, na'e ma'u mai ai 'a e tali faka-'ofisiale mei he Pule'anga Vanuatú, 'oku 'ikai ke to e fakahoko ha folau vakapuna 'i he vaha'a 'o Fisi pea mo Vanuatu 'o 'ikai ai ke tali 'a e kole ke fakafoki mai 'a e kainga Tonga na'á nau tukuvaká 'i Fisí mo e taumu'a ke nau folau mai ki Tongá ni hili 'enau kolonitini 'i Vanuatú.

Na'e hoko atu 'a e ngaahi fetu'utakí 'o fakafou 'i he Air Vanuatu, ki he komiunitī Tonga 'i Vanuatú, na'a faingamalie ke foki mai 'i he vaká ni 'a kinautolu hotau kainga Tonga 'i Vanuatú. Na'e 'i ai foki mo e ni'ihi 'i Tongá ni na'e palani ke nau folau atu ki Vanuatu 'i he foki 'a e vakapuná, ka na'e to e kaniseli 'a e faingamalié ni koe'uhí ko e 'uhinga pē mei he kautaha vakapuná. ‘Oku ‘ikai ha manavasi’i ‘a e kau Tonga mo e fanauako Tongá, pea ko e fanau Tonga na’e ‘ikai ke nau faingamalie ke foki mai he ‘oku lolotonga lele ‘enau ngaahi kalasi pea kuopau ke nau nofo ‘o fakakakato ‘enau ako ‘i Vanuatu. Ko e 'uhinga ia na'e 'ikai ai ha pasese mei hotau kainga Tonga 'i Vanuatu ke nau kau mai 'i he faingamalie folaú ni, koe'uhí na'e 'ikai ha taha na'e fie folau mai.

Koe'uhí ko e ngaahi ongoongo 'oku 'ikai ke mo'oni 'oku tufaki holo 'i he mítia faka-sōsialé, 'oku tuku atu ‘a e fakamatalá ni ko e 'uhinga 'o e folau mai 'a e vakapuna Air Vanuatu mo e kau pasese 'e toko 14 ke hoko atu ‘o e polokalama langa fakalakalaka 'a e Pule'angá mo hokohoko atu 'a e palani ngāue 'o hangē kuo fakahā atu 'i 'olungá.

'Oku 'i ai foki 'a e kau ngāue muli mei he ngaahi Pule'anga Mulí 'oku te'eki faingamālie ke nau tū'uta 'i Tongá ni koe'uhí ko e founga lōlōa 'o e folau mai 'i Nu'usilá, ko e 'uhinga ia 'o e tali 'o e folau vakapuna mai mei Vanuatú, tu'unga 'i he hao mo e malu 'o Vanuatu ‘o fakahoa ki Nu'usila, Fisi pea mo 'Aositelēliá. Ko e vakapuna kotoa pē ‘i he polokalama Repatriation ‘oku folau mai ai ‘a e ni’ihi ‘o e kau ngāue muli ko e taumu’a mai ke nau ngāue ‘i he ngaahi ‘ofisi faka-tipilometika ‘i Tongá ní pea mo e ngaahi poloseki ngāue ‘a e Pule’angá mo e ngaahi Fonua fengāue’akí.

Na'e fakahoko foki mo e kole ki he Pule'anga Ha'amoá pea mo e ma'u mafai 'o Ha'amoa 'Ameliká (Pagopago), ke faka-folau ki ai 'e he Pule'angá 'a hotau kāinga tukuvaká 'i Fisí, ʻo ‘uluaki kolonitini kimuʻa pea nau toki foki mai ki Tongá ní. Ka e hangē ko e tali mei he Pule'anga Vanuatú, 'oku 'ikai ha faingamālie folau mei Fisi koe'uhí ko e uesia tamaki 'a Fisi 'e he mafola 'a e vailasi KOVITI-19.
'Oku hokohoko atu pē 'a e ngaahi ngāue ke fakafoki mai ʻa hotau kainga tukuvaká, 'o 'ikai ko e folau mai ‘i Nu'usila pē, ka ko e faka'amu ʻe faingamālie 'a e ngaahi fonua kaungā'api 'i he Pasifikí, ke nau foki mai ai tu'unga ʻi he lōlōa 'o e tatali ki ha MIQ ʻo hangē ko e founga lolotonga ʻo e folau mai ʻi Nuʻusilá.

Leave a comment

Make sure you enter all the required information, indicated by an asterisk (*). HTML code is not allowed.

Contact Us

Publisher: Justin ʻAkauʻola
Editor: Filokalafi ʻAkauʻola
Email: talaki.online@gmail.com
filokalafi@gmail.com
Tel: (676) 28186
Mb: (676) 7719708
(676) 7700107
website:www.talaki.to

PTH 3
Go to top