PTH 2

Tu’uta e Koviti 19 ‘i Tonga, maʻu he tokotaha mei he toko 215 ne folau mei Christchurch, Nuʻu Sila Featured

Friday, 29 October 2021 19:40
(1 Vote)

 Poasi Pohiva

Talaki Online, 29 ‘Okatopa 2021; KUO fakahā fakapuleʻanga ʻe he ‘Eiki Palēmiá, kuo ma’u ‘a e tokotaha ‘e he mahaki Koviti 19 mei he toko 215 ne nau folau mei Christchurch, Nuʻu Sila he vaka ‘Ea Nuʻu Sila ne tuʻuta he Pulelulu 27 ʻo ‘Okatopa ni.

Neongo ‘a e toki fakahā ‘e he Palēmiá, ka na’e ‘osi pe ‘a e hoha’a ‘a e kakaí, koe’uhí ko e mama ‘a e ‘imeili ‘a Dr ‘Ana ‘Akau’ola ‘one fakahā ai kuo ‘iai ‘a e tokotaha ‘oku tesi ‘o positive he Koviti 19. Ko e email ʻeni ʻi he taimi 1:48pm ka ne toki fakahā ʻe he Palemiá ia ki he fonuá ko e 5:47pm ‘o e ‘aho ni.

Na’e feinga pe ‘a e ‘Eiki Palēmiá ke fakamahino ki he fonuá ‘i he’ene fakahā he ʻaho ni, ke ‘oua ʻe fai ha hohaʻa mo ha ilifia.
Pohivas Head“Kuo fakapapau’i mei he Potungaue Mo’ui, kuo a’u mai a e vailasi Koviti 19 ki Tonga ni. Ko e tokotaha ko ia naʻe kau mai he folau mei Nuʻu Sila he ʻaho Pulelulu 27 ‘o Okatopa, ko e kau pasese kotoa ‘oku tauhi kotoa ‘i he Hotele Tanoa mo Makeke. Ko e tokotaha mahaki ko eni 'oku tauhi ‘i Tanoa Hotel.

Na’e toe fakahā ‘e he Palēmia ‘oku malu hono tokanga’i a e tokotaha mahakí ni pea ‘oku ‘ikai ha faka’ilonga ia ai ‘oku ne ma’u ‘a e Mahaki Koviti 19. ‘Oku ‘ikai ke mahino fau ‘a e me’a ‘a e Palēmia ki he konga ko ia. Kaekehe, ko e me’a pe ‘oku mahino kuo ‘i Tonga ‘a e mahaki Faka’auha Koviti 19.

‘I he lolotongá ni ‘oku kolonitini mo e kau ngāue ne nau ngāue ki hono tokanga’i e kau pasese ko ení. ‘Oku toe fakahoko mo honau sivi koviti. Na’e fakahā ‘e he Minisitā Mo’ui na’e fakahoko e tukuingata e kau ngaue ‘otumu’a ki hono tokanga’i e kau folaú ni.

Naʻe fakahā ‘e he Palēmia ‘e toe talaki ‘a e tu’utu’uni e Kapinetí ki he fonuá pe ‘e fakahoko ha tapuni fakataputapui fakafonua mahalo he Monite, kae ‘ikai ke fakahā ‘a e taimi ‘e fakahoko aii, ka ko e fakaʻapē pe.

Ko e kotoa ngaahi katoanga tautautefito ki he ʻaho ʻo e Kolisi Tonga he Tokonaki uiké ni mo e ngaahi lotú, ʻoku kei tuʻulā hoko pe ia. Ka ʻe toki fakamahino he Monite ha ʻu tuʻutuʻuni ki he hoko atú.Nopele Fielakepa

Kuo ‘osi fakatau folofola e Palēmia ki he Tama Tu’í, pea ko e me’a pe ne fakahā ko e fiema’u mei he Tu’í ke hoko atu mo fakamalohi’i mei he Pule’anga ‘a e huhu malu’i e kakaí. “Kuopau ke fakapapau’i kuo huhu pea toki ata ke ‘alu ki ai (feitu’u fakapule’anga).”

‘I he lolotoga ni kuo a’u ki he peseta ‘e 86 e kakai kuo nau ʻosi huhu tuʻotaha pea ʻi he peseta 66 e niʻihi kuo nau ʻosi huhu tuʻo uá. Ka ʻi he ʻaho ni, ʻoku toe vaveange ʻa e feinga ʻa e kakai naʻe ʻikai ke huhu ke na huhu hili ange hono ʻilo kuo ʻi Tonga ʻa e Koviti 19.

Leave a comment

Make sure you enter all the required information, indicated by an asterisk (*). HTML code is not allowed.

Contact Us

Publisher: Justin ʻAkauʻola
Editor: Filokalafi ʻAkauʻola
Email: talaki.online@gmail.com
filokalafi@gmail.com
Tel: (676) 28186
Mb: (676) 7719708
(676) 7700107
website:www.talaki.to

PTH 3
Go to top