PTH 2

Fakapapauʻi he ʻahó ni hili e Kapinetí e hoko atu ki ai e Fonuá he Koviti-19 Featured

Monday, 01 November 2021 09:38
(1 Vote)

Hotele1

Talaki Online 1 Novema 2021; KUO ʻosi fakahiki ʻa e matapule naʻe tesi positive he Koviti-19 mei he Hotele Tanoá ki he Vaʻa ‘o e Potungaue Moʻuí ʻi Muʻá he Tokonaki kuoʻosí. ‘Oku tauhi malu ʻaupito ai ʻa e matapulé ni hili ʻene foki mei he ngaue fakamisinale he vakapuna efiafi Pulelulu 27 ʻo Novema mei Christchurch, Nuʻu Sila.

Naʻe fakahā ʻe he CEO ʻo e MOH, Dr Siale ʻAkauʻola, naʻe ʻosi ʻomai pe ʻa e fakatokanga ki muʻa ʻi he tuʻuta ʻa e vakapuna ʻa e ʻasi ʻa e Koviti-19 ʻi he vahenga Christchurch. Ko e ʻuluaki ʻasi ʻeni pea ko e kalasi ʻoku oma ʻene mafola ko e Covid-19 Variant, 'uhinga ia ko e feliuliuaki vave 'a e Kovití 'i he'ene hu ki he sino 'o e tangata, pea mafola he 'eá.

Boarder4Ko e pasese ʻe 215 ne nau foki ai ki Tongá, tokolahi ko e kau ngaue he Polokalama Toli Fuaʻiʻakau, kau Sipoti ne nau kau ki he ʻOlimipikí mo e niʻihi kehe pe. Ko e matapule ne maʻú ne ʻikai ke kau ia ha taha he ongo kulupu lalahi ko ʻení.

Ko e paasipooti ki he heka he vaka ki Tongá, kuopau ke ʻuluaki huhu, sivi Koviti 19 he houa ʻe 72 kimuʻa he heka vaka, ʻikai ha toe taha mei ʻOkalani pea feituʻu kuo ʻasi ai ʻa e Koviti-19. Hili ʻa e ʻilo ʻoku ʻi Tongá ni ʻa e keisi positive ʻe tahá, naʻe vakaiʻi ʻe he Potungāue Moʻui ʻa e niʻihi ne nau feohi vaofi mo e tokotaha ko ʻení ʻi heʻene lolotonga ʻi Nuʻu Silá ni. Ko e tokofā pea kuo ʻosi hono sivi mo tauhi makeheʻi ka ʻoku nau ʻosi nekativi hono siví 'i Nuʻu Sila ia.

‘I he lolotongá ni, hili ʻa e ngaahi fakataha ʻa e ngaahi Timi Ngāue Makehe (Task Force) ʻoku taki ai ʻa e Hon.Poasi Tei mo e Hon. Pro. ʻAmelia Tu’ipulotu he Tokonakí, ʻoku ʻiai ʻa ʻenau fokotuʻu ki he Kapinetí ki ha Tapuni Tapui Fakafonua (TTF - National Lockdown).

Ka tali ʻeni he Kapineti he Monite ʻo e ʻaho ni, pea ʻe kamata leva he 12:00 tuʻapo ki he 12:00 tuʻapo Sapate kahaʻu ʻa e TTF ko ʻeni. ‘Oku fakatefito pe ʻeni ki Tongatapu mo Haʻapai. Ko e kau ʻa Haʻapai he ko e tokotaha 'o e kau ngāue ki he vakapuna NZ ʻo e ʻefiafi 27 ʻo Novema kuo ʻi Haʻapai ia.

Ko e kau ngāue ki he vaká ni ʻoku ʻave nautolu ʻo tauhi makehe ʻi he Hotele Kupesí ʻi Fuʻamotu he lolotongá ni. Naʻe fakahā ʻe he CEO ʻo e Moʻuí, ʻoku ʻiai pe ʻenau hohaʻa koeʻuhí ko e ʻikai ke tokolahi ʻa ʻenau kau ngāué ʻokapau ʻe tauhi e tokolahi he Kolonitiní.

HuhuKuo ʻosi fai e talanoa ʻa e CEO, Dr ʻAkauʻola ki he ngaahi vaʻa hangē ko e folau vaka tahí mo e vakapuna ʻe tuʻu mo ia he uike ni.

Kaekehe, kuo ngaʻuta ʻa e kakai ʻo nau ʻalu ki he ngaahi faiʻanga huhu ke huhu talu mei he Tokonaki mo e Sapate. Ko e ʻAsinika ʻoku huhuʻaki ʻa e kakai lalahi pea huhuʻaki e Faisa ʻa e longaʻi fanau taʻu iiki. Kuo ʻi he 86% e kakai kuo nau huhu ʻuluaki pea 62% e niʻihi kuo nau huhu tuʻo ua, ka ko e foʻi ʻasi e positivi ko ʻení, kuo fetuli e kakai ke nau huhu leva.

Naʻe kamata ʻa e ʻasi e Koviti-19 he ʻaho 31 ʻo Tisema 2019, vave ʻaupito ʻene mafola ʻi Wuhan, Siainá ʻo kamata ai ʻa e tapuni fakavavevave ʻa e ngaahi fefolauʻaki he 2019. Kaekehe ʻoku aʻu ʻeni ki he kakai ʻe 246 miliona kuo nau puke pea 5 miliona kuo nau mālōlō mei he mahakí ni fakatatau kihe setisitika ʻa e WHO. ʻOku ʻosi kamata ʻa e huhuʻaki maluʻi 'oi mamani ʻa e faitoʻo maluʻi Oxford-Astra Zeneca mo e Pfizer-BioNTech, Modernaize, Johnsons n Johnsons he konga fakaʻosi ʻo e 2020.

‘I Mē ʻo e taʻú ni naʻe kamata ai ʻa e huhu maluʻi ʻi Tonga ʻo ngāueʻaki ʻa e Astra Zeneca, naʻe malōlō ai e fineʻeiki taʻu 90 hili pe hono huhu he taʻú ni. Naʻe ʻikai ke fakapapauʻi ko e tupunga mei he faitoʻo ko ʻení ʻa ʻene malōloó. Kuo ‘osi lava atu ʻa e kau ngāue Potungaue Mouʻí ki he ʻotu motú ʻo fai e huhu maluʻí.

Siale Akauola CEOKo e Tapuni Tapui Fakafonua ko ʻení, ʻoku kei lele mafana ʻa e ngaahi kemipeini ʻa e kau Kanitīteiti ʻe toko 75 ki Fale Alea. ʻOku teu e fili ki he ʻaho 18 ʻo Novema 2021, toe pe ʻa e ʻaho ʻe 17.

Kuo ʻosi fakahā ʻe he Palēmia ʻo Nuʻu Sila, Rt.Hon.Jacinda Ardern ʻe kamata he ʻaho 8 ʻo Novema ʻa e ʻikai ke toe kolonitini ʻa e kau folau mei Tonga, Ha’amoa, Tokelau mo Vanuatu koeʻuhí pe ko e ʻikai ke nau fefaʻuhi mo e Koviti-19.

‘E toe tukuhifo mo e taimi ʻo e tauhi he feituʻu tauhi makehé (MIQ) mei he ʻaho 14 ki he 7 pe pea ʻaho 3 ki ʻapi ‘i Nuʻu Sila. Taimi tatau ko e tuʻutuʻuni pau ia ʻa e Air NZ ki he kau pasese kuopau ke nau huhu maluʻi pea nau toki heka ki loto vaka.

Kuo kamata ke fakahoko ʻi Tonga ni ʻa e fiemaʻu ʻa e ngaahi pisinisi ʻa e kaati huhu maluʻi mo e meʻamaluʻi ngutu (mask) kae toki fakaʻatā ki he loto pisinisí ʻo hangē ko PTH, ʻu Pangikeé mo e ngaahi ʻofisí.

Naʻe fakaloto lahi e Palemiá he'ene me'a he letiō, ko e talu e teuteu ʻa e puleʻangá he mahina ʻeni ʻe 20 ki he ʻaho ko ʻeni ʻoku tuʻuta ai e Koviti-19 'i Tonga ni.

Leave a comment

Make sure you enter all the required information, indicated by an asterisk (*). HTML code is not allowed.

Contact Us

Publisher: Justin ʻAkauʻola
Editor: Filokalafi ʻAkauʻola
Email: talaki.online@gmail.com
filokalafi@gmail.com
Tel: (676) 28186
Mb: (676) 7719708
(676) 7700107
website:www.talaki.to

PTH 3
Go to top