PTH 2

Maʻu e sino ʻo Gabby Petito kae kei hokoatu e fekumí ki hono kaumeʻá, Brian Laundrie Featured

Sunday, 26 September 2021 23:25
(0 votes)

Screen Shot 2021 09 26 at 112608 PM

Ko e taha ʻeni ʻi ha keisi lahi ʻoku lolotonga ngāue atu kiai ʻa e kau Polisi fakatotolo ʻa ʻAmeliká pea ʻoku ʻulu taha hifo ʻa e ngaahi Kautaha Ongoongo lalahi ʻa mamaní ki hono muimuiʻi ʻa e tupuʻanga ʻo e pekia ʻo ha finemui taʻu 22 mei New York ko Gabby Petito hili ia ʻa ʻene pulia lolotonga ʻa ʻene fononga ʻeveʻeva mo hono kaumeʻáʻ Brian Laundrie tau 23 mei Florida ʻi he mahina ko ʻAokosí.
Gabby

Fakatatau ki he fakamatala kuo tuku maí, ʻi Sune ʻo e taú ni naʻe mavahe ai ʻa Gabby pea mo Brian mei Florida ko e kamata ia ʻa ʻena ʻeva meʻalelé ʻo fakataumuʻa ki he ‘ū vahe fonua lalahi ʻo ʻAmeliká mo e ʻū Matanga Paaká ʻo aʻu ki Siulai mo e mahina ko ʻAokosí. ʻI Sepitema ʻaho ʻuluakí naʻe foki hifo ai ʻa Brian ki Florida ʻoku ʻikai ke ne foki fakataha mai pea mo Gabby. Naʻe hangē ai ʻoku hā ngalingali kehé ʻeni ki he ongomātuʻa ʻo Gabby fakataha pe moe ʻikai kena toe maʻu ha fetuʻutaki mei hona ʻofefiné talu mei he ʻaho 25 o ʻAokosí fakataha mo e ʻikai pe ha toe faita hake ʻena ʻofefiné i he mītia fakasosialé. Naʻe toki lipooti ai ʻe he famili ʻo Gabby ʻa e meʻa ʻoku hokó ʻi Sepitema ʻaho 11 ʻo kamata mei ai ʻa e kumí.

Lolotonga ʻa e fekumi mo e fifili ʻa e familí pe ʻoku ʻifē ʻa Gabby naʻe ʻikai pe foaki ʻe Brian ha lea ʻe taha maʻae famili ʻa hono kaumeʻá pe ʻi ʻai haane mataʻi fakatomala ʻi he pulia ʻa Gabby. Naʻe hoko leva ʻeni ke siofi ʻe he kau polisí ʻa Brian he koe tokotaha fakamuimui pe ia naʻe fakataha pea mo Gabby. ʻI he kamata koia ke ʻilo lahia e fakatotolo koʻení naʻe kamata ke lipooti mai ai ʻe ha niʻihi ʻo kinautolu naʻa nau fakatokangaʻi ʻa e ongo kaumeʻa koʻení ʻi he feituʻu naʻa na fononga aí.

Gabby policeNaʻe tukuange mai ai ʻe he kau polisí ha ʻata ʻi heʻenau taʻofi ʻa Brian mo Gabby ʻi he halá hili ia e maʻu ʻe he kau polisí e lipooti mei ha fefine ʻoku ʻi ai ʻa e fakamamahi ʻi he feituʻu Utah ʻi ʻAokosi ʻaho 12. Naʻe fakamatala ai ʻe Gabby ki he kau polisí mo ʻene tangí ko e talu mei he pongipongi ʻo e ʻaho koiá mo ʻena kē pea ʻokú ne ilifia naʻa faifaiangé kuo liʻaki ia ʻe Brian ʻi he feituʻu ʻokú na ʻi aí ka naʻe iku pe ʻeni ʻo solova ʻe he kau polisí pea hokoatu ʻa ʻena fonongá.

Ko e meʻa ʻeni ʻoku toe fakaloto mamahi ki he fāmili ʻo Gabby mo e kau fakatotoló ko e toe feinga ʻa e ongomātuʻa ʻo Brian ke maluʻi ʻa ʻena fohá mei he ngaahi tukuakiʻi kuo fai kiaí. ʻOku toe fakatumutumu ai ʻa e kau muimuiʻi ʻo e keisi koʻení ko e aʻu ki he ʻaho 17 ʻo Sepitemá naʻe lipooti mai mei he ongomātua ʻo Brian ʻa e pulia ʻa Brian pea mo ʻenau sio fakamuimui pe kiai ʻi Sepitema ʻaho 14.

Ko e ʻaho ʻaki ia ʻe 7 ʻa e fakatotolo ʻa e kau polisí ki he sino ʻo Gabby. Naʻe tukuatu ai ʻe he kau polisí ki ha taha pe naʻe ʻi he ʻelia ʻo Wyoming pe fakatokangaʻi ʻa e veeni naʻe fonoga holo ai ʻa e ongo kaumeʻa koʻení kenau tokoni mai ki he kumi ʻo Gabby. Naʻe maʻu ai ʻe he kau polisí ha fetuʻutaki mei ha ongomātuʻa ko Jenn mo Kyle Bethune ʻoku ʻi ai ʻa ʻena vitiō ʻoku ʻasi ai ʻa e veeni ʻa Gabby ʻi he feituʻu Wyoming. ʻI he vitiō koʻení ʻoku ʻasi ai ʻoku tātāpuni malu ʻa e veení pea ʻoku lī ʻi tuʻa ʻa e hoa vaʻe sū ʻo Gabby fakataha mo ʻene telefoní.

Naʻe fekumi ai pe ʻa e kau polisí ʻi he feituʻu koʻení ʻo toki maʻu ʻa e sino ʻo Gabby ʻi Sepitema ʻaho 19 ʻi he Paaka Wyoming kuó ne ʻosi pekia. Naʻe fakahoko ʻa e sula ki hono sinó ʻo mahino ko e mateʻanga ʻo Gabby ko e tamateʻi kae kei hokoatu ʻa e fakatotolóʻ ki hono kumi ʻo Brian ki ha feituʻu ʻoku toi ai.

Ko e tuʻu ʻi he taimí ni ʻoku lahi ʻaupito ʻa e ngaahi tukuakiʻi ʻoku fai kia Brian mo ʻene ongomātuʻá fakataha mo e tokolahi ʻa e kakai kuo nau tuku mai ʻi he mītia fakasosialé ʻenau ngaahi fakamoʻoni ki he ngaahi fakamamahi naʻe fakahoko ʻe Brian kia Gabby lolotonga ʻena fonoga ʻeveʻevá. ʻOku tokolahi ʻa e kakai mei he tapa kehekehe pe kuo tuku atu ʻenau fie kaungā mamahi mo e fāmili ʻo Gabby Petito ʻi he ongoongo fakamamahi ʻoku nau lolotonga tofanga aí.

Leave a comment

Make sure you enter all the required information, indicated by an asterisk (*). HTML code is not allowed.

Contact Us

Publisher: Justin ʻAkauʻola
Editor: Filokalafi ʻAkauʻola
Email: talaki.online@gmail.com
filokalafi@gmail.com
Tel: (676) 28186
Mb: (676) 7719708
(676) 7700107
website:www.talaki.to

PTH 3
Go to top